Na radionici „Čakavske besede“, u ovo predblagdansko vrijeme, dotaknuli smo se prigodne teme i interpretirali igrokaz „Nonina božićna štorija“. Kroz ovaj tekst, na šaljiv način razgovora koji odaje razlike u godinama, prisjetili smo se topline bakinog doma, kako je sve izgledalo nekad i koliko je važno poznavati stare običaje.
A evo i samog teksta…
NONINA BOŽIĆNA ŠTORIJA
PRIPOVJEDAČ 1:
Oveh blagdanjskeh dan si smo nekako smućeni. Se vokolo nas blešći, sveti i miže. Čovek je na čude kamo bi se obrnul i va ča gjedal. Ma judi sa ta kramarija pijaža. Nekako jih to svetlo razveseli, dava lepotu, i teplinu okol srca.
PRIPOVJEDAČ 2:
Ovo je božićna štorija od današnjega i nekadajnega vremena. Unuka i unuk su z nonun i nonoton va butige. Oni su najveć vremena doma, pak jih pijaža nekamor poć, ma i gušta jih je gledat kako se čude soj toj lušarije ka je okol njih.
UNUKA: Videj nona kakovi gusti, blešteći borići! Ma kako su rastegnuli svoje kiti, okrunjeni, puni boćic!
UNUK: Nono, videj ovi va črjenen kolore, pak ovi va zlatnen! A videj ovi srebrni! Z ovisteh pak i muzika sope!
(Nona i nono hodaju oko borova i čude se. Mirišu ih i diraju grančice)
NONA:
Kakova falsarija! Plastičina! Ma kamo ste nas ovo pripejali? Se j’ uvdeka falso! Nima diha ni moći. Je lepča ona šmrika z šumi, magari i gobasta i dešvana.
NONO: Deca! Šmriku ćemo va kuću stavit, a ne ovo strašilo nabandat! Još ga zovu božićno drvce. Šmriku za maj!
UNUK: Maj? Kakov maj?
NONA: Znaš ča je maj? Ma baš! Seh vas je moderno vreme znemilo! Maj se reče borić aš zgjeda kot kita puna rožic ka cvate va maje mesece. Pod maj ćemo stavit gustega maha, a na njega šenicu.
NONO: A ove boćice i lampice…to ti ni niš! Nekadar smo maj okrunili z bunboni. Imeli su blešteće hartice z cindrići na kraje. Najveć puti smo bunboni i prej Božića pojili, a va harticu kamičić zamotali.
UNUKA: Ma nona draga, to je nekad bilo! Sad tako već ni! Si judi su moderneji pak bimo morali i mi. Videj kot je lepa ova kita z fijočići.
UNUK: Ja, š njun bimo mogli vrata okrunit!
NONA: Š čen ćeš vrata krunit? Z oven? Da nan judi spred vrati pobegnu!
NONO: Naša ćeš vrata okrunit z javorikun i z bršjanon… Tako j’ po užance!
UNUKA: Onda homo baren kupit oni črjeni stolnjak!
UNUK: I onaj svećnjak na zvezdice! Videj kako je lep!
NONA: Ne rabi nan to deca moja! Kuću rabi okrunit onako – po domaću – kao je užanca!
(Nona i nono s unucima izlaze iz trgovine.)
PRIPOVJEDAČ: Tako je kupnjada finila. Nisu niš kupili. Ma tr morda nona i pravo ima.
PRIPOVJEDAČ 2: Se ča nan rabi za kuću načinjit, doma ćemo nać. I još ćemo i šoldi prišparat.
UČENIK1: Poslušajte i vi nonu!
UČENIK 2: Okrunite kuću po domaću!
UČENIK 3: I ćutit ćete se lepo, štimano, i po domaću!
SKUPA: Srećan Božić i Novo leto!
Nina Dukić Srok, prof.
